Siglir tar il cuntegn

Surselva Ernst Bromeis è uss guardian d’onur

Oz è l’ambassadur da l’aua ed iniziant dal «miracul blau» vegnì installà uffizialmain. Sco act simbolic ha Ernst Bromeis survegnì la clav per la tur da signal sin il Pass da l’Alpsu. El è il terz guardian d’onur suenter il duo Mini & Maxi e l’artist Ted Scapa.

Il guardian avant la tur
Legenda: Il guardian avant la tur RTR, H. Giger

La funtauna dal Rain ed il «miracul blau» han in stretg connex. Ernst Bromeis è nudà ils passa 1200 kilometers en il Rain fin a Rotterdam, el è nudà atras il lai grond da mintga chantun svizzer ed atras ils 200 lais en il Grischun. Perquai datti in'exposiziun en il center d’infurmaziun Tgina dal Rain cun 200 buttiglias. Quellas cuntegnan l’aua da quests lais.

L'aua è in regal

A l’entschatta da l'eveniment sin il Pass da l’Alpsu ha Bromeis tegnì in referat sur da la muntada da l’aua. L’aua collia tut ils umans sin quest mund. Noss bainstar sa basia sin questa resursa e quella saja in regal. Il tema aua vegnia a tutgar nus pli e pli en il Grischun. En las medias saja quel preschent – saja quai en connex cun ils tschains d’aua, la schelira permanenta ubain cun il sport d’enviern. Quests temas n'eran betg actuals avant diesch onns, di il nov guardian d’onur per la tur da signal.

las buttiglias
Legenda: las buttiglias RTR, H. Giger

Duas exposiziuns sur dal «miracul blau»

L’exposiziun cun las 200 buttiglias mussa era cartas, plans e fotografias da las expediziuns dal nov guardian. La segunda exposiziun en la tur da signal Tgina dal Rain sa numna «Da la funtauna a la sbuccada – il nudader dal Rain Ernst Bromeis». Ella preschenta 12 fotografias en format grond davart quest tema.

RR actualitad 17:00