Siglir tar il cuntegn

Header

cuntegn

Surselva Era televisiuns e computers han patì dal chametg

La Swisscom attesta da quai da 1'000 clients ch'hajan annunzià donns pervia dal chametg. Il chametg che ha chaschunà in'interrupziun dal current il venderdis passà en grondas parts da la surselva, ha era donnegia computers e televisiuns.

audio
Saira: Chametgs Lumnezia: donns tv computers
ord Actualitad dals 25.07.2016.
laschar ir. Durada: 2 minutas 50 Secundas.

Ina giada che la forza electrica è puspè turnada, han ins vesì chi ha dà donns. Las televisiuns ed ils computers ch'eran colliads cun la forza electrica han per part gì donns irreparabels. Annunzias da disturbis hai dà en la regiun da Glion, Sursaissa ed en Lumnezia.

Reparar na funcziuna betg adina

La fatschenta da radio e televisiun Expert Surselva a Glion ha gì var 15 annunzias da disturbis ch'els han pudì schliar direct per telefon cun declerar a las persunas co installar da nov las apparaturas. Auters sajan vegnids cun la televisiun direct en fatschenta, ha ditg l'electricist da multimedia Carlo Tuor. Las televisiuns purtadas hajan els per part pudì reparar. Autras sajan stadas irreparablas.

Tgi paja?

Donns chaschunads vi da televisiuns e computers entras chametgs sajain en il cas normal segirads tar la assicuranza mobigliara. Quai è dentant d'assicuranza ad assicuranza talmain different, che da dar in parairi general, tge chi saja da far, è betg pussaivel. Mintgin stoppia atgnamain sclerir per sasez, tge che si'assicuranza paja. Quai ha in expert da segiradas che na vul betg vegnir numnà, ditg ad RTR.

«Jau dovr l'internet»

La visita tar Leo Derungs – in pur a Camuns che ha dapi il venderdi betg telefon, televisiun ed internet – ha mussa che'i va grev senza quels meds. Leo Derungs ha tradì ch’el fetschia sia atgna prognosa da l’aura cun consultar pliras paginas da meteo en l'internet. Sa laschar sin las prognosas sco pli baud, quai na ristga el betg pli. E senza internet – nagina prognosa. Ussa è Leo Derungs sin la glista da spetga da la Swisscom. I vegn franc anc a cuzzar in per dis fin ch’el è puspè online.

Artitgels legids il pli savens