Siglir tar il cuntegn

Header

cuntegn

Surselva Era quest onn datti graffitis a Danis

Il Hostel «Autra Caussa» organisescha puspè in festival da Street Art a Danis. Questa giada cun lubientscha.

audio
Bunura: «Autra Art Festival» a Danis
ord Actualitad dals 08.06.2017.
laschar ir. Durada: 3 minutas 8 Secundas.

Il Hostel «Autra Caussa» a Danis organisescha questa stad per la segunda giada in festival da Street Art. Tschintg fin otg artists che fan graffitis vegnan a dissegnar lur ovras vid las fatschadas dal hostel. I sa tracta d’artists ch’èn enconuschents en la scena da Street Art e che derivan da la Svizra, Germania e da la Gronda Britannia. Sco quai che la possessura dal Hostel «Autra Caussa» ed organisatura dal «Autra Art Festival», Bettina Seiser, ha ditg, hajan els 1/3 dapli reservaziuns dapi ch’ils artists han dissegnà sin lur fatschadas ils purtrets.

Strategia da marketing per il hostel

Ina da las fatschadas dal hostel Autra Caussa a Danis
Legenda: Ina da las fatschadas dal hostel Autra Caussa a Danis autracausa.ch

La stad passada aveva Bettina Seiser organisà per l’emprima giada in festival e laschà dissegnar sin la fatschada da ses hostel ed era sin il mir da la via gist giusut. Quai aveva procurà per reclamaziuns. Ella aveva fatg quai senza lubientscha. Perquai aveva la vischnanca pretendì ch’ils dissegns stoppian vegnir allontanads. Quai vegnan quels era. Bettina Seiser è dentant sa cunvegnida cun la vischnanca da Breil. Damai ch’i sa tractia d’ina strategia da marketing per il hostel pon las fatschadas – dentant mo quellas da la chasa – vegnir curcladas cun dissegns.

Mintga onn in festival – ni nagins maletgs vid il hostel

La premissa è che quai vegn mintga onn fatg da nov. Sch’i na dat nagina cuntinuaziun dal festival, lura ston las fatschadas puspè avair ina suletta colur. Ils purtrets sin il mir giusut il hostel ston dentant vegnir allontanads. Cun questa soluziun è Bettina Seiser cuntenta. Avant ch’ils artists vegnan l’avust vegnan las fatschadas puspè coluradas da nov e preparadas uschia ch’ils artists pon puspè cumenzar cun lur lavur. Avant ston dentant vegnir inoltradas skizzas dals maletgs a la vischnanca per che lezza possia dar glisch verda.

Il hostel Autra Caussa a Danis ed il mir giusut nua ch'ils artists han pudì dissegnar.
Legenda: Il hostel Autra Caussa a Danis ed il mir giusut nua ch'ils artists han pudì dissegnar. autracaussa.ch

Street Art

Avrir la box Serrar la box

Street Art deriva dal graffiti. Igl art è naschi ils onns 70/80 cura ch’i vegniva dissegnà il pli savens illegal vid mirs purtrets da tut gener. Ils artists vulan mussar ch’els na lavurian betg mo sin via ed illegal, mabain ch’els èn buns artists. Ozendi creeschan quels artists era ovras sin incumbensa e vegnan era pajads persuenter.

Artists preschentan lur art per albiert e dunsena

Naschida è l’idea da far in festival da Street Art entras il contact cun Gabriela Domeisen ch’è stada giast en il hostel. Ella fotografescha Street Art e curetescha era tala art per sia galaria a Baden. Uschia enconuscha ella fitg bain la scena e curetescha era ils artists per il festival a Danis.

Il festival ha in budget da 20’000 francs. La gronda part da quels vegn duvrada per la colur ch’ils artists dovran u lura era per puntanadas per vegnir vidlonder tar la fatschada. Ils artists survegnan albiert e dunsena en il hostel. Finanzià vegn il festival da sponsurs, fundaziuns e cun daners da marketing dal hostel.

Il festival è cunzunt dals 17 fin 22 d’avust. Lura vegnan las fatschadas visiblas da la via anora dissegnadas ed i dat era ina bar, lavuratoris per uffants e concerts en il Hostel Autra Caussa. Dissegnà vegn dentant durant l’entir mais, perquai che betg tut ils artists pon vegnir ils dis dal festival a Danis.

RR actualitad 08:00

Artitgels legids il pli savens