Siglir tar il cuntegn
Inhalt

Surselva Er Sagogn sto spargnar aua

Suenter Glion è Sagogn uss la segunda vischnanca en Surselva ch'appellescha a la populaziun da spargnar aua. Sco emprima mesira ha la vischnanca da Sagogn reducir l'aua dals numerus bigls en la vischnanca. L'appel da spargnar aua duai valair fin che l'aura mida.

Sagogn ha in reservuar che vegn spisgentà da quatter tschiffadas. Ussa porschan quellas 800 liters aua la minuta. La tendenza è dentant ch'ella tschessa. Sagogn dovra actualmain 700 liters aua la minuta. Quai vul pia dir che la situaziun n'è anc betg acuta. Dentant vul la suprastanza esser precauta e pronta – e quai ad uras. Anc na datti era betg in scumond da sauar ils curtins. Sche l'appel da spargnar n'avess betg da meglierar la situaziun, suondian lura scumonds. Quai scriva la vischnanca en il fegl uffizial.

Plazza da golf

A Sagogn sa tschenta la dumonda tge far cun la plazza da golf. Là vegnan numnadamain sauadas grondas surfatschas. Quai vegn però be fatg cun l'aua che va surora. Quella aua spisgenta il lai dal golf Sagogn e cun quella aua pon els sauar la plazza da golf. Uschè ditg che l'aua va surora, mitscha er la plazza da golf.

RR novitads 11:00