Siglir tar il cuntegn

Surselva Energia Alpina: nov’ovra idraulica e bun quint

Il mars 2016 ha ina bova fatg donns en la Val Strem. Tranter auter ha ella destruì il bajetg da l’ovra idraulica. Perquai ha l’Energia Alpina construì in bajetg nov. Quai sco er il segund meglier quint da l'istorgia resulta dal rapport da gestiun 2017.

La nova tschiffada.
Legenda: La nova tschiffada. energia alpina

Ils 22 da december 2017 han ins prendì en funcziun puspè l’ovra idraulica. Quai suenter ina fasa da bajegiar fitg curta ed intensiva. Las pli grondas sfidas sajan stadas l’entira procedura da lubientschas, ina planisaziun optimala dal nov indriz da la tschiffada ed il temp fitg curt da construcziun. La raschun è ch’i sa tracta dad in bajetg nov en in nov lieu.

Il schaner 2017 ha l’Energia Alpina inoltrà al chantun la dumonda d’approvar il project. L’avust han ins pudì cumenzar cun las lavurs da construcziun da la nova tschiffada. Quella è vegnida construida ca. 60 meters pli ensi, vul dir: la autezza è sa dauzada da 216 sin 224 meters. L’effect è ch’i dat ina surproducziun da ca. 200’000 uras kilowatt.

La nova tschiffada.
Legenda: La nova tschiffada. energia alpina

Assicuranza surpiglia donns

L’assicuranza surpiglia la gronda part dals donns vid bajetgs ed installaziuns. Era la sperdita da retgav da 2.4 milliuns francs, perquai che l’ovra idraulica n'è betg stada en funcziun durant 21 mais, paja l’assicuranza.

Sco quai resulta dal rapport da gestiun ha l’Energia Alpina cuntanschì il segund meglier quint da sia istorgia. Cun ina svieuta da 9’321’971 francs ha quai dà in cashflow da 2’870’155 francs. Il gudogn schuber munta a 677’898 francs. La vischnanca da Tujetsch survegn 600’000 francs.

RR novitads 06:00