Sco l’Uffizi da chatscha scriva saja la femella chattada (F33) la mamma dals pitschens dals onns 2018 e 2019 dal triep dal Piz Bargias. Sche la medema femella haja era gì pitschens l’onn passà na possian ins anc betg dir, ma ulteriuras analisas pudessan mussar quai, ha ditg Marc Hosig sin dumonda da la FMR. La situaziun da cunfin tranter ils dus trieps, cunzunt en la regiun dal Mundaun, ma era en auters lieus saja extraordinaria, scriva l’uffizi. Tuttina na saja quai betg in cumportament spezial, tals conflicts sajan adina puspè d'observar e dasper l’uman saja il luf sez ses pli grond inimi, conferma il spezialist da lufs Peter A. Dettling. Cun tals conflicts saja era da quintar en il futur.
Luf chattà a Siat n'è betg d’in triep vischin
Gia ils 21 da december era vegnì chattà in luf datiers dal vitg da Siat. Tar quest animal na possian ins betg dir tar tge triep ch'el tutga. Sulet che quai saja ina femella (F84). L’animal ch’era vegnì blessà d’in accident l’entschatta da l'onn è ina femella giuvna (F82) dal triep da Valgronda naschida l’onn passà, scriva l’uffizi.
Analisas mussan che betg tut ils lufs vegnan si da l’Italia
Las analisas da DNA hajan mussà che la gronda part dals lufs vegn da l’Italia, ma betg tuts. Uschia mussa la cumprova d’in mastgel (M161) che ha vivì la stad passada datiers da Puntraschigna ch’el è oriund dal Balcan. In auter luf mastgel (M162) cumprovà datiers da Furna è oriund da l’Europa centrala, scriva l’Uffizi da chatscha e pestga.
