Siglir tar il cuntegn

Header

Navigaziun

Legenda: Guardar il video Project per lai a Surrein. Durada 00:19 minutas.
Or da RTR dals 18.07.2016.
cuntegn

Surselva Emprims sondagis per la zona da recreaziun Salischinas

La gruppa d’interess Salischinas vul bajegiar tranter Rabius e Surrein, en la planira gest sper il Rain, in lai da far bogn cun la pussaivladad dad ir cun skis sin l’aua (Wakeboard).

Sper il lai da far bogn, duai er dar differents stabiliments da restauraziun. Il Rain en la vischinanza dal lai duai vegnir renatiralisà ed uschia daventar pli attractiv per carstgauns e natira. Las attracziuns prevesidas en il conturn dal lai da far bogn èn numerusas. Uschia duessi dar in zoo da charsinar ed in lajet da pestgar.

Emprims sondagis aua sutterrana

Tenor ina communicaziun da la gruppa d’interess vegn cumenzà quels dis cun ils emprims sondagis per controllar la qualitad da l’aua sutterrana. Planisads èn 5 sondagis fin ad ina profunditad da 15 enfin 20 meters. Las lavurs da sondar cuzzan enfin mez december. Era planisà è ina emprova da pumpar aua sutterrana. Cun apparats tecnics vegnan registradas diversas datas sco p.ex. il livel ni era la temperatura da l’aua sutterrana durant almain 1 onn.

Cumpensaziun per puresser

Era previs è ina tratga da peschs, gest sper ils lajets da divertiment. Quella tratga da peschs è sco quai che la gruppa d’interess Salischina di, ina cumpensaziun per in manaschi puril che perdess bler terren, sche quest project vegniss realisà. Per la varianta da basa per la zona da recreaziun Salischinas duvrassi 16 hectaras terren. Da quai èn 5,5 hectaras da privats e varga ina hectara è pastgiras. In ulteriur problem savess esser che 2,4 hectaras èn en la zona da protecziun da la natira.

La planira dentar Rabius e Surrein nua che il lai da far bogn duess vegnir è ussa teren agricul
Legenda: L‘attracziun turistica tranter Rabius e Surrein dovra bler terren agricul. mad

Vischnanca da Sumvitg pli attractiva

La vischnanca da Sumvitg duai survegnir ina attracziun turistica da stad argumenteschan ils iniziants. Surrein/Rabius entamez la Surselva saja in lieu central. Il clima saja ordvart adattà: la stad saja quai en la planira da Surrein numnamain fitg chaud per far bogn, e l'enviern fitg fraid per duvrar il lai sco plazza da glatsch.

Sco pli grond impediment per la realisaziun da quest project zona da recreaziun Salischinas vesan ils iniziants sez ils suandants puncts:

  • Las leschas da planisaziun territoriala
  • Las leschas d’aua sutterrana
  • Il diever da terren
  • La surfatscha da cultivaziun alternanta (Fruchtfolgefläche)
Curdin Maissen igl iniziant e Rino Caduff davant il lai dil Giachen che exista gia en questa regiun.
Legenda: Iniziant Curdin Maissen (san.) e coordinatur Rino Caduff han preschentà lur ideas. RTR, C. Albin

Almain 5 milliuns francs

Ils custs muntan ad almain 5 milliuns francs per la varianta la pli simpla da quella zona da recreaziun, uschia ils iniziants. Cunquai ch'il project na saja dentant anc betg concret, na possia era betg vegnir calculà ils custs totals.

Emprim stoppian differentas examinaziuns vegnir fatgas, p.ex. da l'aua sutterrana. Pir lura possia il project vegnir concretisà. Per quest motiv ha l'iniziant dal project, Curdin Maissen sco era il coordinatur dal project Rino Caduff, anc betg pudì infurmar co la zona da recreaziun duai vegnir finanziada.