Siglir tar il cuntegn

Surselva Emoziuns tar l’infurmaziun davart center da requirents d’asil

Il chantun ha infurmà la populaziun da Mustér davart il center da requirents d’asil. L’interess è stà fitg grond.

Blera glieud en la sala Fontauna a Mustér
Legenda: Grond interess per l'infurmaziun davart il center da requirents d'asil a Mustér. RTR, G. Hosang

L’infurmaziun ha carmalà en la sala Fontauna tranter 250 e 300 persunas. Ellas han tadlà cun attenziun las infurmaziuns dal cusseglier guvernativ Christian Rathgeb e il manader da l’Uffizi da migraziun e da dretg civil, Marcel Suter. L’infurmaziun è cunzunt vegnida fatga per ch’ils abitants da Mustér possian far lur dumondas, ha Christian Rathgeb punctuà.

Christian Rathgeb
Legenda: Christian Rathgeb infurmescha a Mustér. RTR, G. Hosang

Dumondas ha quai lura era dà. L’entschatta da la discussiun è dentant stada in pau chargiada. Dumondas sco tge ch’ils requirents d’asil fetschian per ils daners ch’els survegnian, sche quels dastgian purtar in faziel da chau e critica vers la politica d’asil da la Svizra han procurà per ina atmosfera in pau chargiada. Marcel Suter è lura dentant vegnì da calmar la situaziun cun far attent ch’il chantun Grischun haja chapientscha ch’ins na saja betg cuntent cun la politica d’asil da la confederaziun. Il chantun stoppia dentant exequir quai che la confederaziun cumondia. Christian Rathgeb ha la finala anc punctuà ch’il chantun stettia londervi tar la confederaziun per che la pratica da prender si fugitivs da la confederaziun daventia pli clera.

Populaziun è plitost solidara

Probabel na sa legra nagin propi ch’i vegn a mez il vitg da Mustér en il Hostel Cucagna davent da primavaira in center da requirents d’asil. Uschia manegia in dals preschents che in tal center saja adina en il falli lieu per ils pertutgads. In ferm applaus hai lura era dà cura ch’in autra persuna ha ditg: «I vegn carstgauns! N’emporta betg sch’igl è fugitivs da guerra u fugitivs economics ubain sch’i portian in faziel da chau u na.»

Gruppa accumpagnanta

Sco savens han ils preschents fatg quitads pervia da la segirtad, betg sco ultim pervi da la scola e la scoletta ch’èn gist en la vischinanza. Igl è vegnì infurmà ch’i na dettia naginas construcziuns da saivs u insatge sumegliant enturn il Hostel Cucagna. Era na saja quai betg previs ch’i dettia ina controlla permanenta entras ina fatschenta da segirtad. Uschè lunsch sco pussaivel duai il team che maina il center empruvar da schliar eventuals problems. Sche quai na saja dentant betg pussaivel, vegnia il chantun immediat ad instradar ina tal servetsch da segirtad.

Per pudair schliar tants problems sco pussaivel gia avant ch’ils requirents vegnian, respectiv en las emprimas emnas che quels èn a Mustér, vegnia quai a dar ina gruppa accumpagnanta. Quella vegnia a s’accumpagnar da represchentants dal chantun, da las autoritads communalas, da la polizia chantunala ed ulteriuras persunas ord vischnanca tenor il giavisch da la vischnanca. Questa gruppa discuteschia e prendia encunter giavischs e reclamaziuns e discussiunia ils problems.

Custs per la vischnanca

Pliras giadas èn ils custs vegnids tematisads. Il represchentants dal chantun han punctuà pliras giadas che la vischnanca naja nagins custs cun il center da requirents d’asil. Era custs socials n’haja la vischnanca betg da temair. Durant tschintg onns ch’in fugitiv ha il status renconuschì da fugitiv, vegnian ils custs cuverts entras la confederaziun. Aifer quai temp duai il fugitiv dentant vegnir integrà uschia ch’el stettia sin atgnas chommas. Pir suenter haja la vischnanca lura da dar agid social sche la persuna na stat betg sin atgnas chommas. Mo la gronda part dals fugitivs tschertgian lura cura ch’els han la pussaivladad d’abitar en ina citad u en l’aglomeraziun.

Vischnanca po forsa profitar in zichel

Ils requirents d’asil na ston betg lavurar per ils daners da satg ch’els survegnan. Els hajan dentant da tegnair en urden il center ha ditg Goerg Carl, il manader da la partiziun d’asil dal chantun Grischun. Blers dals fugitivs veglian dentant lavurar. Perquai po la vischnanca laschar far lavurs ils requirents d’asil. Sco quai ch’il president da vischnanca Francestg Cajacob ha ditg, savess la vischnanca metter avant da per exempel laschar meglierar sendas e trutgs. La vischnanca da Medel haja fatg bunas experientschas.