Siglir tar il cuntegn

Surselva Domat banduna Surselva Romontscha

La vischnanca da Domat extrescha definitiv ord da la Surselva Romontscha. Quai ha la presidenta da vischnanca da Domat, Beatrice Baselgia confirmà ad RTR. Malgrà quai na èn ils lioms tranter la Surselva Romontscha e Domat betg ruts.

Vischnanca da Domat
Legenda: La vischnanca da domat na fa betg part pli da la Surselva Romontscha. mad

Sco Vitus Gartmann il president da la Surselva Romontscha ha ditg, n’è la decisiun da la vischnanca da Domat betg ina surpraisa. Gia tar l’inscunter dal december passà saja sa mussà, che la suprastanza communala da Domat na vegnia betg a reponderar la decisiun. In pau trumpà è Vitus Gartmann da la moda e maniera co la decisiun definitiva è vegnida communitgada. El haja survegnì in e-mail cun duas lingias cun il messadi che Domat restia tar la decisiun. Vitus Gartmann metta en dumonda, sche quai è la dretga via da communitgar chaussas politicas.

Liom resta

La soluziun è che l’Acziun romontscha Domat resta commembra da la Surselva Romontscha. Sco Vitus Gartmann è quai ina buna soluziun. Sche la suprastanza n’haja betg la veglia da collavurar, lura na sappian ins betg sfurzar, di Vitus Gartmann. «Nus stain meglier cun ina gruppa Acziun romontscha a Domat ch’è s’engaschada e che ha interess da promover e mantegnair il rumantsch» punctuescha el vinavant. Era Urs Cadruvi, il secretari da la Lia Rumantscha è cuntent cun la soluziun. L’Acziun romontscha saja ina gruppaziun che s’engascha ferm per il rumantsch a Domat ed ha era in ferm pled en il chapitel cura ch’i va per il rumantsch en vischnanca.