Siglir tar il cuntegn

Surselva Distec SA ponderescha da bandunar Trun

Pervi da mancanza da lavur per la partiziun da la Distec SA a Trun vegn fatg ponderaziuns da dischlocar questa enavos a Mustér.

La Distec SA a Mustér.
Legenda: La Distec SA a Mustér. RTR

2005 è la partiziun da stanzar vegnida dischlocada a Trun per avair dapli plaz e pudair engrondir la partiziun. Sco quai che Marino Elia Wagner, il responsabel per la communicaziun da la Distec SA, ha ditg a Radiotelevisiun Svizra Rumantscha, saja quai betg reussì d’acquistar uschè blera lavur per pudair engrondir la partiziun. Il cuntrari saja il cas. Fatschentas svizras laschian far las lavurs da stanzar en l’exteriur. Lavurs da l’exteriur na saja era betg pussaivel d’acquistar pervi dal ferm franc svizzer ed ils auts custs da producziun en Svizra. Perquai pondereschia la Distec SA ussa da puspè dischlocar la partiziun da stanzar da Trun enavos a Mustér.

Sche pussaivel betg relaschar collavuraturs

Sche quai ha ina consequenza per las 4,5 plazzas da la partiziuns da stanzar n’è anc betg cler. Sco quai che Marino Elia Wagner ha ditg lavurian tscherts collavuraturs gia ussa per part en partiziuns a Mustér. Per ils collavuraturs tschertgia la Distec SA la meglier pussaivla schliaziun e sa sprovia da na betg stuair relaschar persunal. La decisiun tge che capita cun la partiziun da stanzar duai vegnida prendida fin il mars.