Dis da schlagher quintan cun 3'000 visitaders

En la Val Tujetsch è tut pront per il festival da schlagher da la fin d'emna, ils 9 e 10 da settember. La gronda part dals bigliets saja vendida, di Stefan Birri, commember dal comité d’organisaziun.

La tenda dals dis da schlaghers

Legenda da maletgs: La tenda dals dis da schlaghers RTR, H. Giger

Ils bigliets da la sonda sajan vendids en la categoria auta, ma per venderdis dettia anc singuls bigliets. En tut quintan ils organisaturs che 3'000 persunas vegnian al festival da schlagher. Ils daners per il preventiv, passa 350’000 francs, èn rimnads.

La sonda passada è la tenda vegnida installada sin il parcadi da las pendicularas da l’Arena da skis Andermatt-Sedrun a Dieni.

Stefan Birri.

Legenda da maletgs: L’organisatur Stefan Birri è persvadì dal nov concept. RTR, Flurin Clalüna.

Sco Stefan Birri di sajan 40 gidanters en acziun. Per pudair organisar meglier il transport dals giasts curseschan bus tranter Dieni – Mustér - Glion e Dieni - Andermatt. Ils organisaturs na san betg quantas persunas che vegnan cun l'auto, speran però, ch’ils blers vegnian cun meds dal traffic public.

Cursa da pors selvadis

Sper la musica pon ils giasts era giudair in program accumpagnant. Tranter auter datti ina cursa da pors selvadis, in'exposiziun dad oldtimers e sonda, ils 10 da settember, in'ura d’autograms.

Era il 2017 in festival da schlaghers

E cler èsi gia ch’i dat puspè il 2017 in festival da schlaghers en la Val Tujetsch. Tranter ils artists ils pli enconuschents da quest onn èn DJ Ötzi ubain Francine Jordi.