Il plan da fatschenta preveda da bajegiar 6 hotels, 5 chasas d’appartaments ed ina chasa per ils collavuraturs.
1'400 letgs
En tut datti 450 stanzas cun 1'400 letgs. Sco il pledader da medias da l’Andermatt Swiss Alps (ASA) Stefan Kern di, n'èsi anc betg decidì sch’i vegn era construì abitaziuns secundaras. En il plaunterren vegnan restaurants, stizuns, ina fatschenta da sport, ina pasternaria ed ina canorta d’uffants; suten 800 parcadis sin trais auzadas.
Il matg duai il cussegl d’administraziun cun il president Samih Sawiris decider dal plan da fatschenta. La finamira saja d’elavurar in project preliminar e d’inoltrar la dumonda da bajegiar la fin da l'onn 2021.
Sco Stefan Kern di plinavant, haja la ASA prendì enta maun il project. Quel na vegn betg realisà en etappas sco quai ch'igl era vegnì communitgà a la preschentaziun il settember 2019.
Il fondo d’immobiglias Mountain Resort Real Estate Fund Sicav na fa betg part pli dal resort da vacanzas a Dieni. Pervia da corona veglia quel sa concentrar sin projects actuals.
In bus local
Dentant sto era la vischnanca da Tujetsch cuntinuar la lavur. Impurtant saja da crear in bus local e da sclerir, tge capacitads che quel dovria, di il president communal Martin Cavegn.