Siglir tar il cuntegn

Di dal mund digital Surselva digitala: svilup ord vista da la firma «informatica»

La firma Aurax Informatica è vegnida fundada l'onn 2002. Dus onns pli tard ha l'Aurax fusiunà cun la Rätia Energia SA e la sparta informatica è ida atgnas vias.

Tavla da l'interpresa «informatica»
Legenda: L'interpresa «informatica» è vegnida fundada l'onn 2002. RTR, Carlo Albin

Quai ch'aveva entschet cun tschintg lavurers ed in sulet client, è oz ina firma cun 40 lavurers. Il possessur Herbert Stieger e ses team han influenzà durant quels 15 onns la digitalisaziun en Surselva. La fatschenta «informatica» è spezialisada sin clientella da fatschenta e porscha a quellas schliaziuns digitalas.

Herbert Stieger e Marcus Caduff
Legenda: Il possessur da «informatica» Herbert Stieger (san.) cun Marcus Caduff da l'Ospital Regiunal Surselva. RTR, Linus Livers

En 15 onns è sa midà bler

La prestaziun dals computers è bler pli gronda, ma er tut quai che ha da far cun l’internet è daventà pli spert. Sco che Herbert Stieger ha ditg, saja dentant era la clientella sa midada. Oz è tut quai che ha da far cun la digitalisaziun insatge dal mintgadi e sa chapescha da sasez. Uschia saja era la pazienza da la clientella sa midada. Tenor il motto, i sto simplamain funcziunar e basta.

Michael Cahenzli
Legenda: Michael Cahenzli lavura dapi 15 onns tar «informatica». El ha vis ed influenzà il svilup digital en Surselva. RTR, Linus Livers

Prognosas nua che la digitalisaziun è a fin, quai na gughegia nagin da far. Las prognosas fatgas avant 15 onns èn il pli probabel gia daditg surpassadas, ed uschia pon ins dir, total digital è realitad ed avegnir.

RR actualitad 08:00