Di da las portas avertas dal ressort da vacanzas ad Ursera

Sin l’areal dal ressort Andermatt Swiss Alps vegn construì actualmain in nov hotel cun 180 chombras e 100 abitaziuns sco era 60 novas abitaziuns da vacanzas.

Il plazzal actual da la Andermatt Swiss Alps.

Legenda da maletgs: Il plazzal actual da la Andermatt Swiss Alps. RTR, C. Albin

Ad Andermatt/Ursera vegn bajegià ils proxims onns ina massa edifizis. Sper il hotel da 5 stailas The Chedi Andermatt vegn il ressort da vacanzas Andermatt Swiss Alps da Samih Sawiris a cumpigliar anc 6 ulteriurs hotels da 4 e 5 stailas, 25 chalets e 42 chasas d’abitar cun totalmain circa 500 abitaziuns. Fin uss èn gia 1 chalet e 3 chasas cun abitaziuns bajegiads. Davent l’atun 2015 èn in nov hotel da 4* e 3 ulteriuras chasas cun total 60 abitaziuns en construcziun. Il plazzal da quest hotel e las 3 chasas è pli grond che 2 plazzas da ballape.

Franz Xaver Simmen, il directur general da la Andermatt Swiss Alps.

Legenda da maletgs: Franz Xaver Simmen, il directur general da la Andermatt Swiss Alps. RTR, C. Albin

Betun da la val Ursera

Betg tut il material da construcziun per quai plazzal vegn transportà si da la bassa. Il betun ed era la crappa per construir l’hotel e las chasas vegn producì en la Val d’Ursera, datiers da Realp. Tenor il directur general da la Andermatt Swiss Alps è quai in grond avantatg e spargna blers transports. Tut il rest vegn dentant transportà cun camiuns tras la Chavorgia da la Scalina enfin il plazzal.

In transport cun la Viafier Matterhorn-Gottard n’è betg planisada. Tenor il CEO da la Andermatt Swiss Alps Franz Xaver Simmen fiss quai memia cumplitgà da stgargiar ils camiuns a Caschanutta e metter il material sin il tren. Ultra da quai stuessan era las staziuns da Caschanutta ed Andermatt/Ursera vegnir adattadas per far da quels transports.

Nova chanalisaziun pervia dal ressort

Pervia da la grondezza dal ressort da vacanzas ha la serenera d’Andermatt/Ursera stuì vegnir engrondida l’onn 2014. Ed era la chanalisaziun, ils conducts d’aua persa sco era da l’aua da plievgia e naiv, ha stuì vegnir planisads da nov. La nova chanalisaziun vegn era ad avair consequenzas per l’entira Val d’Ursera. A partir dal 2017 vegn tut l’aua persa mo pli rimnada en la serenera d’Andermatt/Ursera. La serenera da Realp vegn serrada.

RR actualitad 08:00