Siglir tar il cuntegn

Header

Navigaziun

Daniel Fischer che muossa 3 prospects da Flem Laax Falera.
Legenda: Daniel Fischer, il president da la Flims Laax Falera Management AG. RTR
cuntegn

Surselva Destinaziun Flem Laax Falera duai vegnir engrondida

Tenor ina idea da la Flims Laax Falera Management SA, ch’è responsabla per la purschida turistica da la destinaziun da vacanzas Flem Laax Falera, duain las 3 vischnancas Trin, Sagogn e Schluein era vegnir integradas en la destinaziu. Enfin il 2018 duai quella integraziun esser realisada.

Per il president da la Flims Laax Falera Management SA, Daniel Fischer, datti cunzunt 3 motivs pertge ch'i fa senn d’engrondir la destinaziun. Primo pretendia la politica en general adina dapli organisaziuns regiunalas e betg mo localas. Secundo sappia il giast gia profitar da purschidas en quellas 3 vischnancas e terzio dumondian novs projects da svilup pli e pli fitg ina cooperaziun regiunala.

Organisaziun damain flexibla envers dapli daners per investiziuns

Il grond dischavantatg fiss tenor Daniel Fischer la grondezza da la nova destinaziun. Coordinar 6 vischnancas enstagl da mo 3 faschess tut pli plaun. En in temp nua che decisiuns ston vegnir prendidas fitg spert, fiss quai in grond dischavantatg. Ils puncts positivs fissan dentant predominants. Ina meglierà qualitad da la purschida e dapli meds finanzials per novas investiziuns, fissan fitg buns motivs per engrondir la destinaziun.

Nova destinaziun enfin 2018

Enfin la fin d'avrigl duess il concept esser semtgà, era cun il consentiment dals partenaris existents. Alura pon cumenzar las discussiuns da detagl cun las vischnancas pertutgadas. Sche las reacziuns èn positivas, spera Daniel Fischer da pudair realisar l'engrondiment da la destinaziun Flem Laax Falera enfin il 2018.