Siglir tar il cuntegn

Header

cuntegn

Decisiun dal Tribunal federal Prime Elements na po betg bajegiar a Sedrun

Uss èsi definitiv: la Prime Elements na po betg bajegiar ses hotel a Sedrun. Il Tribunal federal refusa il recurs da la societad d'aczias che ha vulì cuntanscher ina terza prolungaziun da la lubientscha da bajegiar.

Il Tribunal federal ha dà uschia raschun a la dretgira administrativa grischuna. Sin la parcella dal vegl hotel Alpsu avessi duì dar in nov hotel cun quatter edifizis ed abitaziuns da vacanzas. Avant set onns ha Tujetsch lubì quest project.

Problems finanzials

La Prime Elements ha stgarpà giu l'hotel vegl. Curt suenter n'ha ella dentant betg pli bajegià enavant, pervi da problems finanzials. Cura che la societad d'aczias ha giavischà per la terza giada ina prolungaziun da bajegiar, ha la vischnanca lura refusà la dumonda. La Prime Elements ha recurrì entras tuttas instanzas – tranter auter cun l'argument ch'ella saja sa fidada da la tenuta positiva da la vischnanca envers quest project.

Fidanza dovri dad omaduas varts

Il Tribunal federal ha publitgà oz, venderdi la sentenzia e fatg cler: La Prime Elements SA na po betg sa referir sin la protecziun da fidanza. Oravant tut betg perquai ch'ella n'haja er betg pudì preschentar termins liants.

RR novitads 12:00

Artitgels legids il pli savens