Siglir tar il cuntegn

Header

cuntegn

Surselva Davosa giada Trais Sontgs Retgs en la scola da Medel

Per la davosa giada ha la scolasta Evelina Giger fatg las preparativas cun ses scolars per chantar da Bavania.

34 onns ha la scolasta Evelina Giger exercità cun ses scolarets las chanzuns da Bavania. Varga trais decennis ha ella mirà ch'ils vestgids e las curunas sesian e che la sminca vesia ora bain. La Bavania 2018 è dentant stada la davosa en scola a Curaglia ed uschia er per Evelina Giger sco scolasta. L'auter onn vegn la scola da Medel serrada ed ils scolars van a scola a Mustér.

audio
Bunura: La davosa giada Bavania en Val Medel
ord Actualitad dals 08.01.2018.
laschar ir. Durada: 4 minutas 2 Secundas.

Sustegn dals pli pigns

En quels onns sajan intginas chaussas sa midadas. Uschia haja d'ina vart dà adina pli paucs scolars ed er adina pli paucas chasadas che sajan stadas da visitar en la Val Medel. Quest onn hajan ils scolars e las scolaras da la tschintgavla e sisavla classa anc survegnì sustegn da quels da la terza e quarta classa. Uschia ch'els èn stads en nov per far ils retgs – ina gruppa da quatter ed ina gruppa da tschintg uffants. Quai che saja dentant betg sa midà saja la motivaziun tar ils scolars. Era quest onn han ils uffants da la Val Medel gì plaschair da sa vestgir da retgs e chantar en las stivas.

Bavania tut speziala

Evelina Giger vid il clavazin. Chantar en cun ils retgs.
Legenda: Evelina Giger exercitescha anc ina giada cun ils scolars. RTR, Selina Chistell

Per Evelina Giger è sia davosa Bavania sco scolasta a Curaglia ina speziala. Ella haja sur tut quels onns fatg bugen quella lavur.

Jau hai schon in egl larmant.
Autur: Evelina Giger Scolasta primara

Uschia veglia ella giudair quest usit specialmain fitg questa giada. Quai ha ella gist savì far trais giadas. La sonda saira èn ils scolars stads da viadi en ils aclauns da Medel, dumengia han els chantà en baselgia ed a Curaglia. Evelina Giger spera che la scola da Mustér tramettia er l'auter onn ina gruppa da retgs en Val Medel e che quai usit na giaja betg a perder.

RR actualitad 07:00

Artitgels legids il pli savens