Daventa la pendiculara da Cassons ina ruina?

Encunter la spazzada da la pendiculara da Cassons datti in recurs, sco l'Uffizi federal da traffic ha attestà ad RTR. I n'è dentant betg stà pussaivel d’eruir tgi che ha fatg recurs encunter la spazzada.

Ils satgados dals para sguladers pendan vit la cabina da Cassons

Legenda da maletgs: Il punct da partenza a Cassons manca als para sguladers che faschevan diever da questa pendiculara. RTR, L. Livers

Tenor retschertgas da RTR n'èn las instituziuns uffizials sco la protecziun da patria ni la tgira da monuments u era la Pro Cassons betg ils recurrents. Probabel sa tracta quai d’ina persuna privata che ha fatg recurs.

La cabina da la pendiculara da Cassons arriva sisum

Legenda da maletgs: 26 persunas han plaz en quella cabina. RTR, L. Livers

La pendiculara da Cassons è ina da las pli veglias pendicularas da la Svizra ed en funcziun dapi l'onn 1956. L'Arena Alva na vul betg pli mantegnair questa pendiculara per motivs economics. La concessiun per questa pendiculara e scadida l'october passà.

La pendiculara da Cassons vegn remplazzada cun ina nova sutgera che tutga a l'uschenumnada «varianta Y». Quella nova varianta per vegnir sin il grad da Cassons vegn realisada sin il pli baud en dus onns. La pendiculara da Cassons è serrada gia dapi l'october passà.

RR novitads 15:00