Siglir tar il cuntegn
cuntegn

Surselva Danis: Hostel Autra Caussa picturà senza permissiun

Ils maletgs da 4 artists da street-art ston puspè vegnir allontanads, pretenda la vischnanca. Il temp n’haja betg tanschì d’inoltrar la dumonda da bajegiar, ha la maina fatschenta dal hostel Bettina Seiser manegià.

Legenda: Guardar il video Hostel Autra Caussa - colurà senza permissiun. Durada 00:45 minutas.
Or da Telesguard dals 15.11.2016.

Ella haja organisà tut mo entaifer 3 emnas ed en quest temp na saja i betg stà pussaivel d’elavurar ina dumonda da bajegiar cumpletta. Damai ch’ils artists sajan stads mo 1 emna en Svizra, haja ella stuì nizzegiar l’occasiun.

Bettina Seiser davant ina fatschada dal hostel.
Legenda: Bettina Seiser davant ina fatschada dal hostel. RTR, Carlo Albin

Ristgar insatge

Ad ella saja stà cler davent da l’entschatta che picturar l'hostel senza permissiun da la vischnanca, possia avair per consequenza ch’ils maletgs stoppian puspè vegnir allontanads.

Pervia da bleras reacziuns positivas haja ella tuttina decis d’inoltrar posteriuramain ina dumonda da bajegiar. Quella saja dentant vegnida refusada. Cun ils maletgs na correspundia la chasa betg al maletg dal vitg. Uss stoppian ils maletgs sin la fatschada e sin in mir sut la chasa puspè vegnir davent.

Visitas aposta pervia dals maletgs

Per Bettina Seiser n’è quai betg in grond problem. Ella vegn ad allontanar ils maletgs e metter en urden tut sco pretendì da la vischnanca.

I saja dentant donn per quels maletgs ed ella haja era gia gì plirs giasts ch'hajan visità l'hostel aposta pervia dals maletgs. Sias experientschas sajan stadas fitg bunas e Bettina Seiser ponderescha gia co ch'ins pudess sviluppar vinavant l’idea da celebrar street-art a Danis.

La vischnanca pretenda ch’ils maletgs vegnian allontanai fin la fin d'avrigl 2017. Bettina Seiser ha inoltrà la dumonda, sch’ella possia far quai pir la fin da matg 2017, suenter la stagiun d’enviern. Anc nha la vischnanca betg decis.

Legenda: Guardar il video Hostel Autra Caussa a Danis picturà senza permissiun. Durada 00:55 minutas.
Or da RTR dals 15.11.2016.

RR actualitad 17:00