Suenter quatter onns èsi stà temp per ils iniziants da la Stalla Libra, Arthur Loretz e Fabio Hendry, da far ina midada. Sco Fabio Hendry ha ditg, saja stà l’idea da crear cun la chasa da gieus insatge pli stabel. Uschia ha el sviluppà ensemen cun collegas dal studi dal master «product-design» a la «Royal College of Art» a Londra in concept per ina chasa da gieus ed ils gieus latiers. Ils students èn schizunt stads a Sedrun per bajegiar ils gieus. Sustegn ha Fabio Hendry era da sia mamma Antonia Hendry, ch’è da nov era en il team da la Stalla Libra e da mastergnants dal vitg.
Gieus per pitschen e grond
Ils gieus èn fitg differents. En ina stanza datti ina purschida per uffants pitschens. Cun elements da gumma-stgima, ch’ins po chatschar en rusnas vid la paraid u bain en auters elements da gumma-stgima, pon ils uffants crear tenor gust e fantasia lur atgnas creaziuns. En in’autra stanza datti in gieu da strategia. Empè da giugar quest sco usità sin in chartun e cun figuras pitschnas èn ils elements dal gieu surdimensiunads ed in bloc cun plattas sin differents nivels. La mazlaria porscha in’entira rotscha da gieus enturn il mastergn dal mazler. Tar il minigolf ed il ballape da maisa èsi da mussar inschign. Sulet il labirint n’è anc betg a fin. Quel duai la finala ir sur duas auzadas.
A la tschertga da gidanters
En tut han las lavurs per la midada da la Stalla Libra sco plaz per art en ina chasa da gieu custà rodund 30’000 francs. Sco quai che Fabio Hendry ha ditg èn ils custs vegnids cuverts cun contribuziuns dal chantun, la vischnanca e sponsurs. L’entrada è libra. La Stalla Libra è mintgamai averta da mesemna fin dumengia da las 11 fin las 18.00 uras. Per avrir e serrar la stalla ch’è a mez il vitg da Sedrun vegn anc tschertgà gidanters ha ditg Fabio Hendry.