Il cussegl da vischnanca da Mustér ha approvà il venderdi saira il project «Avertura Val Segnas – Val Sogn Placi», e concedì per quest intent in credit da 3,9 milliuns francs. Quai cun la resalva che las instanzas chantunalas lubeschian il project, e sustegnian quel finanzialmain. Sco proxim decida il suveran da Mustér il november davart il project.
In dals gronds projects forestals
La via forestala planisada duai ir da la Val Segnas en il vest da la vischnanca fin a la Val Sogn Placi en l’ost. Quai è in dals gronds projects forestals insumma en il chantun Grischun. Meglier duai surtut vegnir l’access al guaud da protecziun. Uschia possia quel vegnir tgirà pli effizient e pli ecologic ha ditg il selvicultur communal Simon Cathomen. Il project è planisà da realisar ils proxims 25 onns ed el duai custar en tut 23 milliuns francs.
Cun ina buna via da guaud che po era purtar camiuns pli gronds pon ins far la lavur cun sugas ed uschia spargnar ina massa sgols da helicopter.
Nagin plan B
A la saira d’infurmaziun da la vischnanca da Mustér è vegnì orientà en detagl daco ch’ina tala via fa basegn. Uschia èsi vegnì argumentà che surtut il guaud dal Run na possia il mument betg vegnir tgirà a moda adequata e senza ina tala tgira na saja il guaud betg abel d’ademplir il basegn sco guaud da protecziun, ha accentuà il suprastant Clemens Berther. Actualmain saja necessari da sgular blera laina cun helicopter e quai fetschia canera ed emissiuns. Ma era la ruta planisada saja buna per resguardar tut ils interess.
Tanghescha la via las auas communalas
La via forestala planisada maina tras la zona da tschiffadas d’aua. Tenor ils responsabels hajan ins resguardà questas zonas e guardà che la ruta na tangheschian betg direct las auas. Vitiers saja la via planisada ponderada bain, surtut per vehichels pli gronds. Ina tala via da guaud pussibiliteschia era en in cas d’incendi da vegnir vitiers cun camiuns ed era en in cas d’accident sappia ella era esser d’avantatg.
Meglieraziun en la Val Segnas
En la Val Segnas possia la via forestala planisada era gist meglierar l'access. Quel na possia senza la via da guaud betg vegnir realisà han ils responsabels ditg a l’orientaziun publica. Uschia saja surtut l’access en direcziun Plaun Grond ed autras aclas garantì. Ils custs annuals per la vischnanca muntian a radund 150’000 francs. Quai muntia trais dis sgular cun helicopter, pertge in di lavur cun il helicopter custa a la vischnanca radund 50’000 francs, accentuescha Clemens Berther.