118 persunas tranter 6 ed 83 onns visitan durant duas emnas ils curs da rumantsch sursilvan a Glion.
Il manader dals curs, Francestg Friberg manegia ch’i dat differentas raschuns persuenter. Per l’ina ch’il rumantsch daventa pli e pli enconuschents e da l’autra vart l’augment da la purschida.
Uschia vegn quest onn era purschì in curs per uffants tranter 6 e 10 onns. Ma era dal trend general d’emprender linguas profiteschan ils organisaturs dals curs.
Ina famiglia che s’entaupa
Sper las lecziuns da rumantsch vegn era anc purschì in vast program da rom. Davent dal chantar chanzuns rumantschas, tadlar referats e concerts e far excursiuns vegn purschì mintga di insatge.
«Suenter il program stain nus ensemen da cumpagnia, mangiain e bavain nus insatge. Quai fa grond plaschair als participants e collia els cun nus, cun la cultura e cun la vallada» declera Francestg Friberg. Ina gronda part dals participants na participescha era betg per l’emprima giada als curs. I saja sco ina gronda famiglia ha ina participanta ditg. In vair virus, manegia ses um.
RR actualitad 07:00