Siglir tar il cuntegn
Inhalt

Surselva Curling: Il schah sin glatsch ha era limitas da temps

Durant ils gieus dal campiunadi svizzer da curling a Flem han ils teams gì mintgamai 38 minutas temp per studegiar lur strategia.

Sanester sut la tavla cun ils resultats vegn inditgà il temp da ponderaziun restont per mintga team.
Legenda: Sanester sut la tavla cun ils resultats vegn inditgà il temp da ponderaziun restont per mintga team. RTR, Carlo Albin

Dapi l’onn 2014 datti en il curling ina limita dal temp da reflexiun. Maximal 38 minutas ha mintga squadra per ponderar la situaziun e la strategia durant in gieu da 10 ends. Quai temp quinta davent dal mument che tut la crappa en il gieu è ferma suenter il tir dal team adversari e cuzza enfin ch’igl agen team ha tira il crap.

A Flem vegn il temp da reflexiun cronometrà da voluntaris, che vegnan scolads da Gian Andrea Tonoli dal Club da curling Flem spezialmain per quella lavur. Era sch’i dat strusch ina giada la situaziun ch’ina equipa dovra dapli che las 38 minutas a disposiziun, sto quai vegnir controllà. La regla correspundenta pretenda numnadamain, ch’in team che surpassa quella limita vegn disqualifitgà. Era sch’il team è en quai mument, tenor puncts, en avantatg.