Curling: Binia Feltscher en la rolla dal matador local

Far la valisch e durmir en hotels – quai s'auda tar la vita d'ina sportista professiunala. Era Binia Feltscher-Beeli è disada quella vita cura ch'ella dat in turnier da curling. La campiunessa mundiala e d'Europa da l' onn 2014 dat turniers sin l'entir mund.

Binia Feltscher.

Legenda da maletgs: Datiers da chasa: Uss astga Binia Feltscher dar ina giada in turnier impurtant senza stuair far la valisch. Keystone

Ils campiunadis svizzers da curling che cuzzan in'entira emna èn numnadamain a Flem, mo paucs pass davent da chasa da Binia Feltscher.

Quella che tschenta ils craps decisivs

La mamma da dus uffants è il skip da l'equipa da Flem, pia quella giugadra che tschenta ils ultims dus craps, ils craps decisivs.

Malgrà l'avantatg da chasa sajan dentant autras equipas da favurisar als campiunadis svizzers a Flem di Binia Feltscher. Si'equipa da Flem saja en la rolla da las chatschadras, mo quella rolla haja ella gugent.

Entrada libra e chaschun da discurrer cun campiuns e campiunessas

Ils campiunadis svizzers da curling da las dunnas e dals umens en la Waldhausarena cumenzan sonda, ils 13 da favrer 2016 e cuzzan fin sonda, ils 20 da fevrer.

L'entrada è libra e mintga saira a las 18.00 uras datti la chaschun da s'entupar e discurrer cun las equipas. Il program detaglià è d'anflar sin la pagina d'internet dal Club da curling da Flem www.ccflims.ch