Siglir tar il cuntegn

Header

Navigaziun

Livia Werder
Legenda: Livia Werder RTR, H. Giger
cuntegn

Surselva Curaglia: Tgasa Sontgaclau sco hotel cun mesa pensiun?

Dapi 2014 è l’anteriura chasa d’attempads a Curaglia vida. Uss datti plans per il futur da la Tgasa Sontgaclau. L’idea è da far in hotel cun mesa pensiun.

En in’emprima fasa duai quai dar 12 stanzas ed in'abitaziun per 40-50 persunas. En il plaunterren datti la recepziun, ina bar cun buffet, in restaurant, biros ed ina stanza per eveniments da cultura ubain seminaris, curs ed exposiziuns, sco la manadra futura da l’hotel Livia Werder di.

Quel duai esser ina dimora per famiglias ubain singulas persunas, insumma per glieud che tschertga il ruaus e la natira en la Val Medel. Mo era ils indigens duain vegnir integrads, saja quai sch’els vulan lavurar en l'hotel ubain per exempel organisar occurrenzas e festas e per auters projects.

Custs da 1,5 - 1,7 milliuns francs

La finamira na saja betg da concurrenzar ils dus auters hotels en la Val, di il promotur da la vischnanca da Medel ed iniziant dal project Rico Tuor. Per recaltgar ils daners veglian els fundar ina societad d’aczias cun in chapital da 200’000-300’000 francs.

La Tgasa Sontgaclau duess vegnir sanada en duas etappas. Las investiziuns muntan a 1,5 – 1,7 milliuns francs. Rico Tuor spera che la vischnanca dettia 200’000 francs e che chantun ed Agid da muntogna dettian ca. 500’000 francs. L'ipoteca munta a ca. 700’000 francs.

La Tgasa Sontgaclau a Curaglia.
Legenda: La Tgasa Sontgaclau a Curaglia. RTR, H. Giger

Livia Werder maina l'hotel

En il futur maina Livia Werder (28) da Turitg la Tgasa Sontgaclau ensemen cun Aluis Albin e Julia Lüscher. Werder ha studegià lavur sociala ed ha lavurà ils ultims onns en la chamona da Cavardiras.

Decisiun a la radunanza communala

Ils 12 da matg vegn il project suttamess a la radunanza communala da Medel cun il contract en dretg da bajegiar e la summa da 200’000 francs sco custs d’investiziuns.