Ils 27 da november han 17 vischnancas da decider schebain ellas vulan daventar part dal Parc Adula ed acceptan uschia il contract dal parc. Ussa dus mais avant èn ils dus comités dal Grischun e Tessin sa mess ensemen per reunir lur forzas e cumbatter communablamain cun quest parc.
«Nus avain da cumbatter per nossa libertad che nus avain qua. La libertad dad ir or en la natira, la libertad da giudair nossa natira. Quai na va betg pli cun in parc naziunal» declera Pablo Maissen dal comité Na, No, Nein Parc Adula. En in tal parc dettia quai leschas e reglas che impedeschian quai. I giaja ussa per infurmar la populaziun davart la vista dal comité cunter il Parc Adula.
Quai conferma era Marcello Monighetti dal comité cunter il Parc Adula en il Tessin. La populaziun n’haja betg il temp e probabel n’era betg l’interess da leger las var 400 paginas da la charta, il contract per il parc. «Nus avain legi questas 400 paginas ed avain vis las cuntradicziun e las passaschas davart las qualas la glieud ha da far ponderaziuns» di Marcello Monighetti. Sin questas cuntradicziuns vul il comité far attent la populaziun. Pablo Maissen fa in exempel: en la charta stettia scrit ch’i saja lubì tut en la zona circumdanta. Intginas lingias pli tard stettia scrit che sch’ins veglia far novs sport ordavert stoppian ins l’emprim contactar il Parc Adula ed elavurar questa purschida. «Ins na sa betg dir ch’i saja tut lubì en la zona circumdanta ed dasperas statti gia scrit en la charta che betg tut è lubì» argumentescha Pablo Maissen.
La versiun finala da la charta n’è dentant anc betg publica, ma era quella vegnia legida attentamain dals comité cunter il Parc Adula per uschia pudair infurmar la populaziun. Quai vul il comité far cun ir tranter la glieud, scriver brevs da lecturs ubain era cun organisar discussiuns da podium.
