Siglir tar il cuntegn
Inhalt

Surselva Critica vers heliports en Lumnezia-sut

In architect giapunais ha construì suitas da luxus a Val. Ina notg en ina da questas 3 suitas custa ca. 2'500 francs. En quest pretsch è cumpri in sgol cun helicopters fin en Lumnezia- sut. Là dess quai 3 pussaivladads da sa tschentar cun helicopter.

In helicopter che duess transportar ils giasts.
Legenda: In helicopter che duess transportar ils giasts. RTR, L. Livers

Mo ils plans da la 7132 SA (ina interpresa da l’investur Remo Stoffel) chaschunan critica per part massiva. Quai è sa mussà venderdi saira ad ina orientaziun en sala plurivalenta ad Uors. Ils iniziants, represchentants entras Ernst Senteler, commember dal cussegl d’administraziun da la Priora Project SA, chapeschan ch’i dat critica. Els pondereschian uss era da tschertgar alternativas per sa tschentar.

Vischnanca Lumnezia ha naginas cumpetenzas

Il president da la vischnanca Lumnezia Duri Blumenthal di che la vischnanca (ed era il chantun) na possian far nagut. Quai sajan prescripziuns da la confederaziun. Sulet il proprietari da funs decidia, sch’el veglia laschar sa tschentar helicopters sin ses terren. Mo la suprastanza veglia discutar il problem. A Val na pon ils helicopters betg sa tschentar, perquai che Val schai sin 1250 meters, e per realisar là in heliport stuess la vischnanca inoltrar ina dumonda a la confederaziun.