Siglir tar il cuntegn

Header

cuntegn

Surselva Crappa per la Casa d’Angel a Lumbrein

Il curatur ospitant Hans Ruedi Fricker ha planisà questa stad ina exposiziun cun e sur da crappa. Per realisar quella exposiziun dovra el crappa dals indigens, crappa ch'els han chattà sez e ch'ha forsa era ina istorgia speziala da raquintar.

Bleras persunas rimnan crappa e quai ord differents motivs. Per decorar il curtin ni era perquai ch'il crap regorda els vid in schabetg. Quellas istorgias vul la Casa d'Angel a Lumbrein preschentar proxima stad en ina exposiziun e perquai ha la gestiunaria Anne-Louise Joël envidà ils indigens da metter a disposiziun lur crappa. Mesemna saira ils 24 da matg è stà l’emprima pussaivladad per dar giu crappa.

La Casa d'Angel a Lumbrein, in center d'art e cultura en la Val Lumnezia.
Legenda: La Casa d'Angel a Lumbrein, in center d'art e cultura en la Val Lumnezia. RTR, C. Albin

Crappa en «millis» variantas

Crappa gronda, crappa pitschna, tut radunda ni cun chantuns, crappa d'ina colur e da quella cun milli colurs, i vegn purtà da tuttas variantas en la Casa d'Angel. Mintga crap vegn numerà, fotografà ed il num dal possessur registrà. Quai per far la segira che mintgin survegn lura enavos ses crap suenter l'exposiziun.

Almain uschè multifaras sco las istorgias e la crappa sezza èn era las persunas che vulan mussar lur stgazis. Umens e dunnas, giuven e vegl, indigens sco era persunas che possedan ina chasa da vacanzas en la val Lumnezia. Ina tala variaziun plascha ad Anne-Louise Joël ed ella è persvasa, che l’exposiziun sur da la crappa da la Val Lumnezia e la Val S. Pieder vegn a gartegiar.

Entgins craps èn gia vegnì surdads durant l'emna a la Casa d'Angel.
Legenda: Entgins craps èn gia vegnì surdads durant l'emna a la Casa d'Angel. Casa d'Angel

La proxima pussaivladad per dar giu crappa en la Casa d’Angel èn sonda e dumengia, ils 3 e 4 da zercladur, tranter las 14:00 e 17:00.

RR actualitad 12:00

Artitgels legids il pli savens