Dals 22 da december 2020 fin ils 22 da schaner 2021 èn las ustarias serradas. Quai ha il cussegl federal decidì. Igl è ina situaziun difficila, ma i dat era aspects positivs.
«I na saja stà simpel»
Era Flurina e Michael Häsch-Maissen han stuì serrar lur ustaria, la Stiva Grischuna a Mustér. Quai è capità ils 4 da december, il di ch’els han vulì avrir ella suenter ch’els han surpiglià il manaschi dals geniturs. I na saja stà simpel, cura ch’il Cussegl federal haja decidì che las ustarias ston serrar.
Alura hai jau schon stuì bragir in zic, perquai ch’ins cumenza la fatschenta, è motivada e vul far insatge.
Dapli temp cun la famiglia
Mo almain possian els preparar spaisas per giasts ed indigens e laschar prender ellas cun els.
In aspect positiv è surtut era ch’ella e ses um possian passentar dapli temp en famiglia cun lur fegl che ha 1 onn e 4 mais, di Flurina.
Nus giudain il temp cun noss buob e giain bler a spass.
Impurtant: Esser sauns
Gist en la gastronomia hajan ella ed era ses geniturs mintgamai stuì lavurar ils dis da Nadal e Bumaun. Plinavant possian els era festivar questa giada il natalizi cun la mamma. E Flurina concluda ch’els veglian guardar positiv en quest temp, giudair il temp cun la famiglia e far il meglier ordlonder. Mintgin haja gea il medem.
I dat era mender. Sche nus essan sauns è quai era schon bler.
