Il consorzi da scola Trun/Sumvitg ha decidì mardi saira, ils 17 da november, ina midada tar las partiziuns da la scola primara. Cun 50 uffants per vischnanca en il stgalim primar l’onn da scola 2017/18 po la scola primara puspè vegnir manada en mintga vischnanca.
Sco quai che Renata Decurtins, la presidenta ad interim dal consorzi da scola ha ditg a RTR, hajan els ponderà pliras variantas. La decisiun saja dentant crudada da far ina partiziun per mintga vischnanca.
Damain custs e gentar a chasa
Questa varianta haja plirs avantatgs. Uschia daventian d'ina vart ils transports in zic pli simpel. Da l’autra vart possian ils uffants da mintga vischnanca turnar a chasa, era sur mezdi. Uschia possia il consorzi spargnar custs ed era sustegnair il giavisch dals geniturs che vulevan avair ils uffants era sur mezdi a chasa.
Il consorzi da scola Trun/Sumvitg vegn dentant a restar flexibels ed adina puspè adattar l’organisaziun, tut tenor basegn. Per la scola superiura resta tut tuttina, ils scolars da Sumvitg van vinavant cun il tren a Trun a scola.
Nov president
Nov president dal cussegl da scola da Trun Sumvitg è Robert Candinas da Rabius. El surpiglia quest post a partir da l'emprim da schaner 2017 da Renata Decurtins, che ha manà il cussegl da scola ad interim.
RR actualitad 07:00