Siglir tar il cuntegn

Surselva Confort per il campadi e lavur per la regiun

Durmir sin il campadi, ma tuttina en ina tgombra. Quai è l’idea da la boxa da campar che duai vegnir construida en la regiun.

L’idea da la boxa da campar è da pudair porscher insatge per persunas ch’arrivan sin in campadi senza tenda ed era ina purschida per l’enviern. Ord quai è naschì la boxa da campar. Il prototip, ch’è vegnì sviluppà dal biro d’architectura Bellevue Studio e construì da la fatschenta Tarcisi Maissen SA a Trun, ha num Cauma e vegn actualmain testada a Trun. Igl è ina boxa or da lain indigen, ch’è isolada cun launa nursa ed ha ina pigna scalegl en l’intern.

Mantegnair plazzas da lavur

Il prototip è vegnì finanzià da las duas fatschentas Bellevue Studio e Tarcisi Maissen SA. Sco quai che Curdin Maissen ha ditg stoppian ins semnar per pudair racoltar insatge. Per el èsi impurtant da chattar novas spartas per uschia pudair mantegnair las plazzas da lavur.

Ina da questas boxas custa var 42’000 francs. Tenor Thomas Furter èsi dentant previs ch’ils campadis u auters interessents pon prender a tschains per tscherts temps las boxas ubain era permanent e cumprar pli tard ella.