Siglir tar il cuntegn
Inhalt

Surselva Colliaziun tranter Andermatt e Sedrun chaschuna deficit

La radunanza generala da l’Andermatt Sedrun Sport SA ha approvà il quint annual da las pendicularas. Il resultat dad 1,9 milliuns francs minus resulta ord omadus manaschis da skis – quel d’Andermatt e quel da Sedrun ensemen.

Purtret da Samih Sawiris
Legenda: Samih Sawiris po rir malgrà il nausch resultat RTR, L. Livers

Ch’i ha dà in deficit haja da far cun ils plans da colliar ils dus territoris da skis. Sco quai ch’il directur da la Ski Arena Andermatt-Sedrun Silvo Schmid di, sajan 1,8 milliuns da quest deficit custs directs che hajan da far cun la planisaziun da colliar ils dus territoris da skis. Senza quests custs avessi dà ina nulla naira el quint dal 2014/15.

La Ski Arena Andermatt Sedrun tutga a l’investider egipzian Samih Sawiris. La svieuta totala da quest manaschi munta a 14 milliuns francs.

Il Cussegl d’administraziun da la Andermatt-Sedrun Sport SA
Legenda: Il Cussegl d’administraziun da la Andermatt-Sedrun Sport SA RTR, L. Livers

A la radunanza generala ha i dà elecziuns dal cussegl d’administraziun. Da nov en quest gremi èn Franz-Xaver Simmen e Matthias Jäggi. Omadus èn er commembers da la Swiss Alps SA, la firma da Samih Sawiris ch'è responsabla per la surbajegiada ad Andermatt e ch’è la possessura da las pendicularas.

RR novitads 15:00