Siglir tar il cuntegn

Header

Navigaziun

Il chau da Maria
Legenda: Il chau da Maria. RTR, Hubert Giger
cuntegn

Surselva Claustra da Mustér: Stgazi prezius en il museum

Las stuccaturas da Mustér èn restanzas d'ina baselgia claustrala dal 8avel tschientaner. Uss èn 9 objects exponids en il museum da la claustra. In dad els è il pli vegl insumma da questa sort en l’Europa.

Chau da Maria

Tar quest object sa tracta quai da la dormiziun da Nossadunna, la mamma da Jesus. Quel vegn numnà la Koimesis. Mo anc ina part dal chau cun ils egls serrads è restada. In’auter object prezius ch'è exponì visavi la Stiva s. Placi è il giuvenessendi.

Il giuvenessendi
Legenda: Il giuvenessendi. RTR, Hubert Giger

Lavur da Walter Studer

Las stuccaturas da Mustér èn 12’000 fragments che archeologs han scuvert avant intgins decennis. L’archeolog Walter Studer ha lavurà plirs onns per metter ensemen els, ed el ha era empruvà d'interpretar intgins. Uschia ha el pudì constatar ch’il chau scuvert saja quel da Maria.

Ils fragments (fatgs e picturads cun maulta da chaltschina) èn restanzas dal mir intern da l’anteriura baselgia da sontg Martin.

Passa 150 figuras

Dus pictur-artists da Byzanz avevan creà passa 150 figuras per la baselgia da sontg Martin. Pli tard è quella vegnida spazzada e la tocca vegnida duvrada per part sco fundament.

Claustra colliada cun il mund

Sco il manader dal museum da la claustra, pader Theo Theiler di n'hajan ins betg chattà tut ils fragments. I saja vairamain in art (in grev puzzle) da metter ensemen e d'interpretar quels.

Intginas da las stuccaturas
Legenda: Intginas da las stuccaturas. RTR, Hubert Giger

Mo las stuccaturas cumprovian che la claustra da Mustér saja stada colliada cun il mund, ed ella saja stada ina claustra benedictina represchentativa.

Uss po era la publicitad guardar quest stgazi prezius en il museum da la claustra.

RR actualitad 11:00