Siglir tar il cuntegn
cuntegn

Surselva Circa 250’000 francs svieuta tar fieras sin pass

L’organisaziun «alpinavera» organisescha mintgamai la stad nov fieras sin ils pass. Trais fieras vegnan fatgas sin ils pass dal Gotthard e da l’Alpsu, duas sin il Lucmagn ed ina sin il Klausen.

Surtut producents dal chantun Uri e dal Grischun

La dumengia dals 9 da fanadur è la fiera stada sin il pass da l’Alpsu. Ils producents derivan surtut dal chantun Uri e dal Grischun, intgins dal Tessin e singuls dal chantun Glaruna. Surtut ils stans che vendan maglia sco charn u chaschiel hajan success. Quai conferma era la manadra da fatschenta dad «alpinavera» Jasmine Said Bucher.

Ina svieuta da 1000 francs

In producent da maglia fetschia per fiera ina svieuta da 1000 francs, intgins era fin 3000 francs. Auter èsi cun ils producents d’artisanadi. Quels fetschian la mesadad, vul dir en media 500 francs per fiera, di Said Bucher.
«Alpinavera» fa pajar per in stan en media 75 enfin 100 francs.

La svieuta è s'augmentada

«Alpinavera» organisescha questas fieras dapi diesch onns. A l’entschatta era la svieuta per fiera anc tranter 5000 e 10’000 francs. Lura avevan els era pli paucs stans. Oz organiseschian els nov fieras e quellas genereschian ina svieuta da ca. 250’000 francs.
I dat era glieud che fa viadis pli lungs per vegnir a la fiera sin in pass. In um ed ina dunna han raquintà ch’els sajan vegnids si da Schaffusa. Els hajan chattà questa fiera en l’internet ed hajan gugent charn e chaschiel da la regiun.

RR actualitad 08:00