Siglir tar il cuntegn
Inhalt

Surselva CHF 50'000 gudogn per Open Air Lumnezia 2017

Il quint da l’Open Air Lumnezia 2017 serra cun in gudogn da 50'000 francs. Quel gudogn han ils organisaturs pudì realisar malgrà grondas investiziuns en l'infrastructura.

Fans e tribuna.
Legenda: Il magnet da public da la stagiun da festivals grischuna – onn per onn attira l'Open Air Lumnezia millis da fans. RTR

Norbert Cavegn, il president dal comitè d'organisaziun, motivescha il gudogn cun in lev augment dals pretschs d'entrada per CHF 5.-. Quel haja gidà da betg far in deficit, uschia Cavegn envers Radiotelevisiun Svizra Rumantscha RTR. La svieuta totala munta a 2,4 milliuns francs. Er quai è in nov record en l’istorgia da l'eveniment, che vegn manà tras dapi il 1985.

«Cashless» è sa cumprovà

Sper la situaziun finanziala fetschia cuntent a Norbert Cavegn er il fatg, ch'il nov sistem da pajar «cashless» è sa cumprovà. Il sistem è vegnì introducì il 2017 en l'areal da festa. Si'installaziun ha chaschunà diversas investiziuns – uschè per exempel en lingias da fibra da vaider tranter ils stans da vendita. Il sistem saja vegnì acceptà bain da las visitadras e visitaders da l'open air ed i haja betg dà bleras reclamaziuns. Sulet suenter l'open air haja dà problems cun restituir daners betg duvrads als visitaders. Quai saja dentant stà in problem tecnic che vegnia schlià l'onn proxim.

Dapli donns durant la demontascha

In segund problem haja era dà suenter il festival durant la demontascha da l'infrastructura. I saja stà fitg bletsch e las grevas maschinas da transport hajan chaschunà dapli donns als funs che auters onns. Quai muntia dapli lavur per ils purs, per l'open air na s'augmentian ils custs dentant betg. Dapi dus onns hajan els in nov contract cun ils purs, che prevedia ina summa fixa per quellas lavurs. Quest onn hajan ils purs gì disfortuna, in onn cun paucs donns saja quai contract dentant plitost en disfavur da l'open air.

RR novitads 06:00+