Chattà successura per l'hotel Belfort ad Alvagni

Ursula Wilhelm che maina la Sportlodge Las Stailas a Lantsch, maina a partir da l’emprim da december l'hotel Belfort ad Alvagni. Quai ha ditg Markus Beer (67), l'hotelier actual che va en pensiun suenter ch’el e sia dunna han manà l'hotel durant 39 onns.

Ursula Wilhelm da Lantsch, la nova hoteliera da l'ustaria e hotel Belfort ad Alvagni.

Legenda da maletgs: Ursula Wilhelm da Lantsch, la nova hoteliera da l'ustaria e hotel Belfort ad Alvagni. RTR, F. Belotti

La nova ustiera Ursula Wilhelm deriva da Vienna en l’Austria. Avant 25 onns è ella vegnida en Svizra ed ha lavurà blers onns en Engiadin’Ota. Avant ch’ella ha surpiglìa la Sportlodge Stailas, ha ella manà durant tschintg onns l’albiert per la giuventetgna a Valbella.

Cun il possessur da l'hotel Belfort Markus Beer, ha ella fatg in contract da fittanza per tschintg onns. Sco quai ch’ella ha ditg, n’excluda ella il mument era betg da pli tard ina giada cumparar l'hotel.

En las lingias grassas è l'hotel Belfort stà avant radund dus onns cur ch’igl è vegnì tschertgà in cumprader per l’hotel sur la plattafurma d’aucziuns da Ricardo. L'hotel n'è lura betg vegnì vendì sur la plattafurma. Sco quai che Markus Beer ha ditg, haja el però gì differents giasts en l’hotel, perquai ch'els èn vegnids attents sin ses hotel grazia a l’aucziun da ricardo.ch