Siglir tar il cuntegn

Header

Ina chasa d’albiert da giuventetgna sin il bogn cuvert sper il lai da Laax duai procura per dapli vita enturn in lai.
Legenda: Ina chasa d’albiert da giuventetgna sin il bogn cuvert al lai da Laax duai procurar per dapli vita en il vitg. RTR, M. Demont
cuntegn

Surselva Chasa d’albiert per giuventetgna a Laax

Il project gist naschì sa numna 'Fascinaziun Laax'. L'idea è da porscher novs impuls per il turissem da stad e quai enturn il lai a Laax sez.

Il project da Laax prevesa che la chasa d’albiert vegniss bajegiada sin il bogn cuvert encunter la plaunca. La chasa duess avair var 180 letgs.

Purtret da Franz Gschwend il president da la vischnanca da Laax.
Legenda: Igl è bunamain memia ruassaivel enturn il lai manegia franz Gschwend il president da Laax. RTR, Linus Livers

Las contractivas cun il partenari principal, l'organisaziun Albierts da giuventetgna svizzers, han lieu gia il schaner e co i ha gì num davart da Laax saja l'interess avant maun dad omaduas varts.

L'orizont da termins per realisar questa chasa d'albiert stat simplamain en stretg connex cun la renovaziun dal bogn che stat avant porta. Sulet per la renovaziun quintan ins cun 4 milliuns francs, tut ensemen custass il project 11 milliuns francs.

Potenzial per il turissem da stad

En Svizra datti 52 chasas d'albiert da giuventetgna e l'uniun Jugi, sco ella vegn era numnada, ha bunamain 100'000 commembers en Svizra. Quest potenzial vul era Laax nizzegiar. Franz Gschwend, il president da vischnanca da Laax, è da l’opiniun ch'ina chasa d’albiert da giuventetgna pudess esser la schliaziun per manar il bogn cuvert da Laax en las cifras nairas. Da preschent scriva il bogn onn per onn 280’000 francs deficit. Sco Gschwend ha menziunà dettia a Saas-Fee gia quella cumbinaziun che la Jugi maina il bogn dal vitg e quai cun success.

RR actualitad bunura 06:00