Siglir tar il cuntegn

Header

cuntegn

Chalira Cundriz da sauar sa paja

L’emna passada ha il termometer mussà temperaturas da quasi 35 grads. Uss vesan ins era puspè ils cundriz da bagnar ils prads. Era en la vischnanca da Sumvitg a Rabius vegnan ils prads sauads.

Sa paja in tal cundriz?

Il pur Carli Tuor ha in manaschi a Rabius. L’onn 2003 ha el investì en in cundriz da sauar circa 20’000 francs. Mirà sur quels radund 15 onns stoppia el dir ch’il cundriz saja sa pajà. Sulet tranter trais e quatter stads n’haja el betg stuì sauar ils prads, ils auters onns haja el mintgamai nizzegià quai.

Danunder prender l’aua?

I dat pliras pussaivladads da nizzegiar l’aua. Uschia èsi pussaivel da prender aua ord d’in aual. Qua saja l’aua in zic pli chauda che ord d’in aquaduct di Carli Tuor. Ma ins dovria en tutta cas ina lubientscha da la vischnanca ma era dal chantun per pudair sauar cun aua ord in aual. Alura dettia quai la pussaivladad da pumpar l’aua sutterrana e l’ultima pussaivladad saja da prender l’aua ord igl aquaduct, pia d’in idrant. Quai possia el far e quai saja la schliaziun la pli simpla e ideala, ma la dumonda cardinala saja l’aua. Il mument haja quai avunda aua er per sauar, ma en futur na possia el era betg dir, di Carli Tuor.

audio
Mezdi: Rabius: Fai senn da schuar ils prads
ord Actualitad dals 03.07.2019.
laschar ir. Durada: 2 minutas 47 Secundas.

Blera aua per ura

Il quantum d’aua che vegn duvrà per ura da sauar è tranter 25 e 30 cubics. Ma quantas uras ch’ins prendia en funcziun il cundrez da sauar, dependia da las relaziuns. L’onn passà saja stà in onn extrem ed el haja stuì laschar ir bleras uras l’aua, uschia ch’ins saja vegnì al limit, di Carli Tuor.

En la Bassa vegnan bagnadas culturas intensivas

Il mument na cultiveschia el betg granezza ma tuttina aria el ils prads e plantia da nov els. Quai portia dapli racolta e uschia rendia quai da sauar talas culturas, accentuescha Carli Tuor. Ma tuttina saja il meglier sch’i na dettia betg stads cun chaliras sur in pli lung temp. La plievgia saja anc adina il meglier per tut ils prads, di Carli Tuor.

RR actualitad 12:00

Artitgels legids il pli savens