Siglir tar il cuntegn
Inhalt

Surselva Center da sport e cultura Mustér: Investiziuns da 15 milliuns

A la sesida dal cussegl da vischnanca dals 20 d’avrigl ha il president communal orientà cusseglieras e cussegliers. Mustér vul valurisar pli ferm il Center da sport e cultura: Per sanar ed engrondir il center vegn quintà cun custs da 15,1 milliuns francs.

Visualisaziun dal nov Center da sport e cultura a Mustér.
Legenda: Visualisaziun dal nov Center da sport e cultura a Mustér. huonder bisquolm architects

Per sanar il bajetg sto la vischnanca impunder e pajar sezza 6.5 milliuns francs. Per engrondir el cun purschidas novas restan 8.6 milliuns. Sco il president Robert Cajacob ha ditg ad RTR, quintian els ch’il chantun dettia 1 fin 1,2 milliuns francs e ch’il Program San Gottardo dettia var 690’000 francs. Quai fissan daners a fond pers. Plinavant vul la vischnanca empruvar da retrair var in milliun francs da la taglia sin plivalur. Ed alura pudess la Confederaziun dar in credit senza tschains da trais milliuns francs. Quel stuess la vischnanca pajar enavos en 20 onns.

Cun deducir ils daners a fond pers ed il milliun da la taglia sin plivalur resta la summa da 12.5 milliuns francs; e da questa summa respectiv da quest credit sto il cussegl da vischnanca decider ils 8 da zercladur. La votaziun dal pievel da Mustér è previsa ils 23 da settember.

Era per il turissem

Robert Cajacob di ch'i saja necessari da sanar il bajetg che haja fatg dapi quasi 40 onns fitg buns servetschs. Il Center da sport e cultura daventia pli e pli attractiv era per ils turists. Ils investiders da l’hotel Acla da Fontauna giavischan ch’il center vegnia sanà.

Il project vegnia realisà en quatter etappas, els stoppian dentant era guardar co quai giaja enavant cun l’hotel Acla da Fontauna. Sche quel na vegniss betg realisà, stuess la vischnanca reponderar la situaziun finanziala, vul dir: ins stuess per exempel desister da construir la sala Fontauna che custass 1,4 milliuns francs.

RR actualitad 07:00