Atgnamain vulevan els prender in pau pli patgific quest onn, di Esther Appenzeller, ina da las manadras da la chasa e da la tgira. Mo alura hajan els ponderà ch’i fiss bel d’organisar in concert sin lur bella terrassa, ed entaifer diesch minutas saja quai vegnì in open air ord in concert.
Stils differents
Il stil da musica è different - da chant e chantauturs fin rock. Esther Appenzeller sa che tut la musica na plascha betg a mintgin, mo questa varietad appartegnia a la vita. Impurtant saja ch’i dettia sentupadas tranter las generaziuns e surtut era ch’i saja ina pussaivladad da s’inscuntrar cun vegls enconuschents.
Preventiv da 20'000 francs
Il preventiv per l’eveniment sut tschiel avert munta a 20'000 francs. L’open air da la Casa Sogn Giusep vegn organisà ils 27 d’avust da la damaun da las 10:00 fin la saira da las 22:00.
Renconuschientscha cun certificat
Sco ina da las emprimas chasas da tgira e d’attempads ha la Casa Sogn Giusep survegnì il certificat da ISO 9001:2015. Ella ademplescha tut las pretensiuns da la norma en la tgira, finanzas ed administraziun, cuschina/nutriment, economia da chasa, tecnica e segirtad. En questa norma vegnan surtut era valitadas las schanzas d’ina chasa da tgira e d’attempads (tranter auter d'organisar eveniments da musica).
RR actualitad 11:00