Siglir tar il cuntegn

Surselva Casa Depuoz porscha lavurer social per scola Glion

La vischnanca da Glion ha chattà cun la Casa Depuoz a Trun ina collavuraziun per avair in lavurer social da scola.

Scola da Glion
Legenda: La vischnanca da Glion ha in lavurer social da scola per sias scolas. RTR, L. Livers

Dapi il nov onn da scola han las scolas da la vischnanca da Glion in lavurer social. Quest lavurer sa gida per exempel cun ils scolars, sche quels han problems a chasa u sch’i dat problems da mobing. El sa gida dentant era cun scolasts e geniturs. Tenor il manader da scola Silvio Dietrich èn las structuras da la scola gia stadas preparadas per in tal post. Cun il lavurer social possian ins augmentar la qualitad da scola. «cun quai vulain nus distgargiar ils scolasts ed ils manaders da scola» di Silvio Dietrich.

Cooperaziun cun la Casa Depuoz

Il lavurer social da scola n’è betg emploià tar la scola da la vischnanca da Glion. Quai ha tenor Jürg Marguth, che ha surpiglià quest post in grond avantatg: la confidenza dals scolars, scolast e geniturs envers el. «Sch’jau fiss ina part da la scola, lura pudess il manader da scola vegnir la saira e dumandar; cun tgi has lavurà oz?» di Jürg Marguth vinavant. Era per Silvio Dietrich è questa independenza impurtanta. Scolars e geniturs duain pudair esser segirs ch’ils cas vegnian tractads confidenzial e che la consultaziun dal lavurer social n’haja naginas consequenzas per exempel sin las notas. La Casa Depuoz vesa anc in auter avantatg tar quest model da cooperaziun. I saja strusch pussaivel per ina vischnanca da chattar in lavurer social per la scola be forsa per 30 pertschient, di il manader da la Casa Depuoz, Matthias Gutmann. Els sco center da scola, furmaziun ed integraziun possian porscher ina cumbinaziun cun plazzas internas ed uschia crear interessantas plazzas per la regiun. La finamira fiss da pudair porscher tschintg fin sis plazzas per lavurers socials en scolas da la regiun. Uschia avessi quai lura en Surselva in gruppa da persunas dal fatg che pudess barattar ora lur experientschas professiunalas.