Siglir tar il cuntegn
cuntegn

Surselva Carstgauns han vivì gia il temp da bronz a Grepault

La culegna da Grepault (visavi Darvella/Trun da l’autra vart dal Rein) è stada abitada durant il temp da bronz, concret tranter 1800-1200 avant Cristus. A quest resultat vegn Mirco Brunner che studegia archeologia a l’universitad da Berna.

La culegna da Grepault.
Legenda: La culegna da Grepault. Wikipedia.
Exchavaziuns a Grepault 2014.
Legenda: Exchavaziuns d'archeologs a Grepault 2014. Mirco Brunner

El e students han fatg exchavaziuns 2014 e la finala ha el scrit sia lavur da master sur da Grepault.
Dapi ils onns da 1930 vegn questa culegna perscrutada. Per il temp da bronz han ils acheologs chattà stgaglias da cheramicas da vaschella da cuschinar, stilets e gluvas. E per il temp medieval tempriv (ca. 700 suenter Cr.) han els chattà in mir, ina baselgia ed ina fossa d’in uffant.

Mo era da l’autra vart da Grepault existiva ina culegna. Ils abitants avevan contact in cun l’auter ed els vevan era contacts ordaifer la regiun, ex. cun Crestaulta en Lumnezia. Ina differenza è ch’ils archeologs han chattà il champ da fossas a Crestaulta, mo quel mancà anc a Grepault.

Sco Mirco Brunner di datti dentant anc bler da far. Ils archeologs sappian anc pac da Grepault.

Ina guva dal temp da bronz, duvrada sco ornament.
Legenda: Ina guva dal temp da bronz, duvrada sco ornament. Servetsch archeologic dal Grischun.