Siglir tar il cuntegn
Inhalt

Surselva Carmelia Maissen candidescha per il presidi da Glion

Ella vul uschia succeder ad Aurelio Casanova che na candidescha betg pli per ina ulteriura perioda d'uffizi. Quai ha ella confermà envers RTR.

Purtret da Carmelia Maissen.
Legenda: Carmelia Maissen gia la vischnanca fusiunada da Glion sco parlamentaria. MAD

Carmelia Maissen ha 39 onns. Ella è creschida si a Sevgein ed abitescha uss a Castrisch. Ils emprims pass politics ha ella fatg en il parlament regiunal da la Surselva. La finala è Carmelia Maissen vegnida elegida l’onn 2013 en il parlament da la nova vischnanca da Glion. Quest parlament ha ella presidià trais onns.

Da sasezza di ella, ch’il meglier num per ses mastergn saja scienziada d’architectura. Ella ha studegià architectura a la ETH a Turitg e silsuenter dà scola là. En il Grischun ha ella lavurà sco sviluppadra regiunala da la regiun Viamala.

Sia motivaziun

Sia candidatura sco presidenta da la vischnanca da Glion argumentescha ella uschia, ch’ella veglia contribuir sia part al svilup da questa regiun. Quest patratg stettia en il center, di ella. La finamira da Carmelia Maissen è che la vischnanca possia lavurar bain ed ademplir las obligaziuns. Era duai la vischnanca sco patruna restar attractiva. Sia candidatura ha Carmelia Maissen d'attestar sco persuna privata, la partida PCD locala vegn a far la nominaziun uffiziala pir en il decurs dal mars. Las elecziuns han lieu ils 21 da matg 2017.

RR actualitad 07:00