Siglir tar il cuntegn
cuntegn

Surselva Campiunadi mundial da skis d'impedids 2019 a Sursaissa

Il Comité paralimpic internaziunal ha decidì da surdar il campiunadi mundial da skis da persunas cun impediments 2019 a Sursaissa. La candidatura da Garmisch-Partenkirchen n’ha betg gì success.

Christoph Kunz, in dals iniziants, durant ina cursa als gieus paralimpics da Sochi 2014.
Legenda: Christoph Kunz, in dals iniziants, durant ina cursa als gieus paralimpics da Sochi 2014. Keystone

Che Sursaissa ha organisà l’onn passà cun success ils finals dal cup europeic ed il campiunadi svizzer da skis da persunas cun impediments, ha tenor Markus Brasser, in dals iniziants, segir gì in'influenza sin la decisiun dal comité paralimpic internaziunal. La segunda candidatura per manar tras quai campiunadi mundial era vengida inoltrada da Garmisch-Partenkirchen.

Cursa dal cup mundial

Sco emprim stoppia uss vegnir fundà in'uniun purtadra per l’occurrenza, ch'è era responsabla per crear in comité d’organisaziun. Tut fetschia in pau prescha, perquai ch’il comité d’organisaziun haja era d’organisar l’enviern 2017/18 ina cursa dal cup mundial per persunas cun impediments sco test per il campiunadi mundial.

Custs da 1,2 milliuns

Markus Brasser quinta cun custs totals da 1,2 milliuns francs per organisar las cursas e bajegiar l’infrastructura necessaria. Betg inclus en quella summa èn ils custs per ulteriuras occurrenzas sco concerts ni cursas da skis da prominents. Questas occurrenzas duain generar avunda entradas da finanziar sasezzas. La finamira cun quellas occurrenzas è da carmalar dapli persunas a Sursaissa durant il campiunadi mundial.

Markus Brasser, in dals iniziants.
Legenda: Markus Brasser, in dals iniziants. RTR, C. Albin

Campiunadis mundials en cifras

  • ca. 140 atlets ord 30 terras
  • 5 disciplinas (cursa rapida, super-g, slalom gigant, slalom e combinaziun)
  • 3 categorias - sesent, en pe e tschorv
  • spetgà 500 aspectaturs a mintga cursa
  • preventiv 1,2 milliuns francs
  • 2018 a Pyeong Chang, Corea dal Sid