A Ruschein en l'anteriura chasa communala sa chatta il dojo, la stanza da trenament dal club da carate Goju-kai da Glion. Qua è era Nico-Alessandro Mognetti da Rabius sa preparà per ils campiunadis europeics en l’Engalterra. Carate è ses grond hobi. Era sch'il scolar dal gimnasi a Mustér ha pir 16 onns, pratitgescha el quai sport gia dapi 11 onns.
En 3 disciplinas sin chatscha da medaglias
Als campiunadis europeics cumbatta Nico-Alessandro Mognetti en 3 disciplinas: kata, team-kata e kumite. Las disciplinas kata e team-kata èn furmas da mussar tecnicas da cumbat. Ils cumbattants han d'exequir ina seria da moviments prescrits. U ch'els fan quai persuls ni en in team da 3 persunas, che fan tuttas ils medems moviments. Il pli fitg sa legra Nico-Alessandro dentant sin il kumite, il cumbat.
Emprim turnier da carate
Ils campiunadis europeics èn l'emprim turnier insumma da Nico-Alessandro. Enfin ussa ha el mo visità 3 turniers da carate sco aspectatur. Sco noviz n'èn sias finamiras betg gist daventar campiun. E
l fiss gia cuntent, sch’el cuntanschess la secunda runda en las 3 disciplinas. In dals gronds siemis da Nico-Alessandro è da viagiar en il Giapun, en il pajais d’origin dal carate. En dus onns è il campiunadi mundial a Tokio. Sche tut va bain, spera el da savair sa participar a quest turnier e cumbatter per onur e medaglias.