Campiun mundial da far pizzas a Mustér

Il Catrina Ressort a Mustér ha pudì engaschar in campiun mundial da far pizzas per la nova pizzaria.

Laschar ir video «Il maister-pizzaiolo Claudio Vicanò en acziun a Mustér»

Il maister-pizzaiolo Claudio Vicanò en acziun a Mustér

2:46 min, dals 9.12.2015

Il maister-pizzaiolo Claudio Vicanò ch’ei oriunds da Roma ha gia recaltgà blers premis cun far pizza. Il bab da trais uffants è tranter auter daventà 2014 e 2015 campiun mundial da far pizza e quai en la categoria Margherita scenografica. Quai è la categoria nua ch’i vegn fatg ina sculptura ord pasta da pizza e latiers ina pizza Margherita. Claudio Vicanò ha fatg per il campiunadi mundial 2104 il Colosseum e 2015 il globus ord pasta da pizza.

Stadi talian prenda tut

Cun titels da campiun mundial ed anc auters blers è Claudio Vicanò enconuschent e survegn era offertas per plazzas. A Mustér è el vegnì perquai che la pizzaria en il Catrina Ressort è nova ed el haja survegnì maun liber co lavurar. La situaziun economica en l’Italia ha manà Claudio Vicanò a la decisiun da dar si sia atgna pizzaria a Roma e vegnir en Svizra. Il stadi talian fetschia pajar tantas taxas e taglias ch’i restia nagut pli per viver. Sch’igl è pussaivel duai sia famiglia lura suandar el en Svizra. Tenor Claudio Vicanò possia el dar a ses uffants in meglier avegnir en Svizra.

Ina pizza per il Papa Francestg

Claudio Vicanò ha era gia ina giada fatg ina pizza per il Papa Francestg. Igl è ina stà ina pizza cun si il purtret dal papa. Quella ha el pudì surdar persunalmain al Papa.