Teater popular
Sco la redactura Lisa Schmidt-Candinas di, haja ella vulì tractar il teater popular ed era il teater professiunal. Manfred Veraguth sa fatschenta en ses artitgel cun il teater popular. Las pitgas da quel sajan las uniuns da Breil, Cuschnaus, Mustér e Sagogn; autras uniuns sco quellas da Luven, Laax, Trun u Rueras sajan (stadas) svanidas ubain vegnidas reactivadas.
Teater professiunal
En la sparta dal teater professiunal preschenta il Chalender acturas, acturs e reschissurs da professiun, ed i vegn era guardà davos las culissas. A pled vegnan Marina Blumenthal, Flavia Walder-Hublard, Martha Giger, René Schnoz, Roman Weishaupt, Remo Arpagaus, David Flepp e Lorenzo Polin.
Teater saja insatge che na saja betg mo local, mabain regiunal, di la redactura. Per cumenzar a rimnar artitgels haja ella tschertgà l’emprim il contact cun Roman Weishaupt da la gruppa da teater «Bagat». Suenter haja el guardà tgi che lavura cun «Bagat» ed uschia haja quai dà ulteriurs contacts.
Mintgin ha ses rituals
E sco ils acturs dattan ina rolla sin tribuna ha era mintga uman sia rolla sin quest mund ubain ses rituals. Sch’ins fetschia quels inconscientamain saja quai disa, mo sch’ins fetschia quels pli conscientamain survegnian els pli blera muntada e forza, e quai sajan alura ils rituals, di Lisa Schmidt-Candinas. E rituals stgaffeschan communitad, identitad e represchentan valurs ed ideals d’ina gruppa, d’ina societad ubain schizunt d' ina naziun, sco igl è scrit en il Calender Romontsch.
E sco mintg'onn porscha questa revista annuala era autras tematicas sco per ex. litteratura, natira, scolaziun e furmaziun, ed ella sa regorda dals defuncts.
RR actualitad 11:00