Tschaiver en la Cadi
Perfin ils uffants da la scolina fan ina contribuziun per il chalender. Els tractan il tema «Tge consolescha mai?» cun crear maletgs persuenter; e da quest tema sa fatschentan era ils creschids en il chalender.
Plinavant vul la redactura nova dar paisa ad ina regiun en Surselva. Questa giada saja quai la Cadi. E là vegn preschentà il tschaiver cun tut las gruppas ed uniuns ed era la dretgira nauscha e la Sibla. Il proxim Calender Romontsch haja in fil cotschen e quel saja fitg musical. Mo dapli na vul la redactura betg anc tradir.
Il motiv ch’ella veglia cuntanscher la giuventetgna saja sia professiun da scolasta. Ella veglia integrar e tschiffar las persunas giuvnas per nossa cultura, noss linguatg e nossas activitads, di Lisa Schmidt-Candinas.
Ils redacturs dal Calender Romontsch.
Onn da publicaziun | Redacziun |
---|---|
1860 - 1903 | Edì da Placi Condrau, inspectur da scola. |
1904 - 1961 | Edì da la redacziun da la Gasetta Romontscha, sut cooperaziun d’intgins amis dal pievel. |
1962 | Pius Condrau e Sur Pius Camenisch |
1963 - 1969 | Pius Condrau |
1970 - 1972 | Dumeni Columberg e Pius Condrau |
1973 - 1988 | Giusep Capaul e Pius Condrau |
1989 - 1991 | Giusep Capaul, Martin Cabalzar e Pius Condrau |
1992 - 1995 | Martin Cabalzar |
1996 - 2003 | Isidor Winzap |
2004 - 2009 | Giusep Capaul |
2010 - 2017 | Florentina Camartin |
a partir dal 2018 | Lisa Schmidt-Candinas |
Il format A5 resta
Entant ch’i dat midadas vid il cuntegn na sa midia il format dad A5 dal chalender betg. Tuttina datti blera lavur cun animar la glieud da scriver, rimnar e curreger texts etc. In agid è l’ordinatur ch’ella ha fatg cun il cuntegn dal chalender, texts ed autras notizias. Ella saja engraziaivla che sia antecessura haja surdà la redacziun cun bleras infurmaziuns nizzaivlas.
S'annunziada spontanamain
La redacziun dal Calender Romontsch ha ella surpiglià spontanamain. Scriver haja adina plaschì ad ella e perquai saja ella s’annunziada. E questa stad giaja ella en pensiun. Mo ella na sa sentia betg veglia avunda per far nagut.
RR actualitad 08:00