Siglir tar il cuntegn

Header

cuntegn

Café Dultschin «L’innovativ è che nus avain realisà il café»

In café saja quai che mancava anc a Breil, din ils osps dal Café Dultschin da la pasternera Karin Müller-Gabriel. Ella ha surprendì la pasternaria avant trais onns da ses bab Stefan Gabriel ed ha questa stad avert l’emprim café a Breil.

Il café chattan ins en la stizun da sport veglia «Marius Sport», gist sut la baselgia en il center dal vitg. La butia è vegnida bajegiada enturn en in café, che porscha plazza per 30 persunas.

Cafés datti en blers lieus, ma anc betg si Breil – e quai è l'innovativ.
Autur: Karin Müller-GabrielManadra da fatschenta da la pasternaria Gabriel

L’idea da cumbinar ina pasternaria ed in café na saja nagut da nov, manegia la dunna da 43 onns. L’idea saja schon ditg stada qua, ma nagin n'haja realisà ella a Breil.

Fitg impurtant per l'agen café saja stà l'agen stil. La glieud sa duess sentir da chasa, dentant na duess il stil betg esser ord moda en diesch onns.

«Cun far investiziuns na stain nus betg salda»

Cura che Karin Müller-Gabriel ha surprendì la pasternaria da ses bab avant trais onns, ha ella savì ch’ella na vul betg simplamain far enavant quai ch’il bab haja bajegià si avant 40 onns. Ella vuleva far insatge nov, ed il café saja schon adina stà in giavisch. Ses geniturs sajan stads intgantads da l’idea.

Il café saja dentant er blera lavur. Karin Müller-Gabriel spera er, ch’ella na stoppia cun il temp betg pli esser pli mintgadi en il Café Dultschin. Ella saja dentant pedantica e veglia che tut va uschia sco ch'ella s'imaginescha quai, di ella cun in surrir.

Products locals

Karin Müller-Gabriel vul lavurar uschè savens sco pussibel cun products locals. Per exempel vegnan il latg e la groma per il glatsch dals purs indigens.

Nus vivain in da l’auter e stuain sustegnair in a l’auter. Ma quai è era quai che la glieud vul: products indigens.
Autur: Karin Müller-Gabrielmanadra da fatschenta da la pasternaria Gabriel

RR actualitad 11:40