Bunas experientschas cun civis si d’alp

Dapi l'onn 2012 pon civis, persunas che na vulan betg far militar ord motivs etics, prestar lur servetsch civil si d'alp. Tenor ils responsabels dal servetsch civil èn las experientschas fatgas en ina emprima fasa d'emprova ils davos 3 onns stadas fitg bunas.

Gion Cathomen, il president da la corporaziun da l’alp Dadens a Falera.

Legenda da maletgs: Gion Cathomen, il president da la corporaziun da l’alp Dadens a Falera. RTR, C. Albin

Tenor ina communicaziun da l’organ executiv dal servetsch civil sajan ils civis sco era ils responsabels da las alps stads fitg cuntents cun quella fasa d’emprova. Uschè cuntents, che quella purschida vegn menada en davent da l’onn 2016 definitivamain el sectur puresser.

12’346 dis da servetsch il 2015

L’onn 2015 èn vegnids prestads 12’346 dis da servetsch sin 199 alps en l’entira Svizra. Mo per il Grischun ha l’organ executiv dal servetsch civil registrà 466 dis da servetsch sin 16 differentas alps. Ina da quellas alps è l’alp Dadens sur Falera. Tenor il president da la corporaziun d’alp Gion Cathomen è l’engaschament d’in civi stà in success ch’els vegnian a repeter l’onn proxim, sch’els chattan in candidat adattà.

Lavurs da tgira

En emprima lingia han ils civis da far lavurs da tgira sco tagliar chaglias, far saivs e trutgs ni mantegnair bigls. Mo en cas da malaura lubeschan las reglas als civis da gidar en stalla u en chascharia. Era astga mintga alp mo engaschar in civi, far gruppas da civis n’è betg lubì. Era betg sche pliras alps collavuran.